mercoledì 4 novembre 2009

გიორგობისთვე, 2009

* * *
თავის-უფლება პიროვნების ზეისტორიულობის ერთ-ერთი უმთავრესი განმაპირობებელია.

* * *
სიგარეტის მოწევის პროცესი - მაზოხისტური ლიტურგია.

* * *
იყავი პიროვნება, კაცი და აკეთე ის, რაც გაგიხარდება. ეს საზოგადოებრივი ბედნიერების მთავარი საზომია.

* * *
პოეტი, რომელიც აძაგებს ფილოსოფიას, დამარცხებული პოეტია. ფილოსოფოსი, ან მეცნიერი, რომელიც პოეტი ხდება-პოეზიის მწვერვალის მკვიდრი.

* * *
ხშირად გამარჯვებები ღმერთივითაა: მათ გული უფრო ხედავს.

* * *
კიჩი მიწიერებას ვერგაცდენილი ცნობიერებაა და ხელოვნებისაგან იმით განსხვავდება, რომ არსობრივად საზღვრული, ამოწურვადია. უსასრულობა მისთვის უცხო ხილია.

giovedì 1 ottobre 2009

ღვინობისთვე, 2009

* * *
არსობრივად, დუმილი შინაგანი საუბარია.

* * *
ღვინო ბედნიერებისთვისაა და არა-დასათრობად.

* * *
ბევრის ცოდნა არ ნიშნავს, რომ ბევრი გესმის. თუმცა, ერთი მეორეს ავსებს.

* * *
ცოდნა სიბრძნისთვისაა საჭირო, სიბრძნე-თავისუფლებისათვის, თავის-უფლება კი იმისათვის, რომ პიროვნებას წარმოადგენდე.

* * *
პოლიტიკის გარდა პოლიტიკაზე ყველაფერს ვკითხულობ, რათა უფრო ღრმად და უკეთესად ვიცოდე იგი.

* * *
დასავლეთმა თეორია პრაქტიკას დაუპირისპირა, აღმოსავლეთმა კი პრაქტიკა-ცოდნას; და ეს მაშინ, როცა ერთმანეთის გარეშე ერთიც იკარგება და მეორეც.

* * *
ადამიანები მისთვის ვვარსებობთ, რომ უფრო მეტად ვაკეთილშობილებდეთ ერთმანეთის როგორც შინაგან, ასევე, გარესამყაროებს.

* * *
სიკვდილის მას ეშინია, ვისაც არ უცხოვრია.

* * *
ადამიანი არსებობას გულით ცხოვრობს.

* * *
ადამიანს სიკვდილთან ღირსეული ჭიდილი და შეძლებისდაგვარად მეტი სიცოცხლის დატევის წყურვილი აკეთილშობილებს.

* * *
მინდია მთელი თავით უფრო მაღლა დგას, ვიდრე ყველა ტექნოგენური ადამიანი ერთადაღებული.

* * *
ტექნოლოგია ზოგისთვის ყავარჯენია, ზოგისთვის-ექსკალიბური.

* * *
ჰომერული სიცილის რაობა ჯოჯოხეთზე უარესიცაა და უფრო დიდიც.

* * *
თავის-უფალი კაცი, პიროვნება საკუთარ ქვენა ვნებებთან მოჭიდავე და ამ ჭიდილში გამარჯვებული ადამიანია.

* * *
ერის კეთილდღეობა თავისთავად სახელმწიფოს აყვავებასაც გულისხმობს მაშინ, როდესაც შეიძლება წარმოადგენდეს რა მმართველი ნაწილის ინტერესების განხორციელების მექანიზმს, სახელმწიფოებრივი სიკეთე იქცეს ერის ბედნიერი ცხოვრების სრულიად საწინააღმდეგო პერსპექტივად.

* * *
ადამიანებს შორის ურთიერთობაში მწერლობას გაცილებით მეტი უპირატესობა გააჩნია, ვიდრე ფილოსოფიას. მაშინ, როცა მეორე შეიძლება უძრავად გაიყინოს ერთ ადგილზე და ნაბიჯიც ვერ გადადგას წინ, ლიტერატურას მუდამ გააჩნია გაყინული წერტილიდან ამოძრავებისათვის საჭირო საკმარისი მარაგი.

* * *
ფილოსოფია ისეთი აზროვნებითი ლაბირინთიცაა, არიადნეს ძაფი თუ არ მოიშველიე, დაიკარგები, დაიღუპები.

* * *
ადამიანი ქრისტეფორე კოლუმბია და ადამიანები-აღმოსაჩენი კონტინენტები.

* * *
არტურ კლარკი + სტენლი კუბრიკი = www.kubrick2001.com

* * *
საკუთარი ერის მოსიყვარულე სხვასაც ღირსეულად ეპყრობა.

* * *
ვინც რბილიცაა, მტკიცეა; ვინც მტკიცეცაა, რბილია.
ვინც მტკიცეა, გადატყდება; ვინც რბილია, დამარცხდება.

* * *
საყვარელი ადამიანის სახელის წარმოთქმა უკვდავი ბედნიერებაა. ამის საფუძველზე ღმერთის წმინდა სახელის წარმოთქმა განუზომლად კიდევ უფრო დიდი მზიურობაა.

* * *
koka + koka reloaded + koka revolution = KOKA...

* * *
არიან ადამიანები, ვისთანაც სჯობს, არ იკამათო. არის ვითარებები, სადაც სჯობს არ იკამათო. ორივეს გაცნობიერება სიბრძნის ნიშანია.

* * *
ყველა ფერი სულ ერთია ...

* * *
გარდაცვალება კიდევ უფრო დიდი სიცოცხლეა, თუკი ცხოვრობ.

* * *
ფილოსოფიას არ მოაქვს ხსნა. იგი მხოლოდ ნაწილობრივ გვეხმარება ამაში.

* * *
ეროვნება პიროვნების განვითარების განუყოველი საფეხურია.

* * *
ფილოსოფია იმ სიმბოლურ "5 ევროს" მიაგავს, რომლის მიხედვითაც შეიძლება მეგობრობის ფასის, თუ ფასდაუდებლობის გაგება.

* * *
თუკი საინტერესო დროში ცხოვრება ჩინური წყევლაა, აპოკალიფსი ასეთი ხანაა.

* * *
მებრძოლი შემართება ცხოვრების სათავისკენ სვლის შემთხვევაშია გამართლებული და აუცილებელი, არა მისგან დაშორებისათვის.

martedì 1 settembre 2009

ენკენისთვე, 2009

* * *
პიროვნულობის ხარისხი დანაღვლიანების ხარისხის უკუპროპორციულია.

* * *
ცხოვრება ფასიანია; ვისთვის ძვირი ღირს, ვისთვის-იაფი. კაპიტალისტური წყობის ხასიათი კი ისაა, რომ ცხოვრებაც და ადამიანებიც სავაჭრო საგნად მოიაზრებიან. ამგვარად, ყოფიერება ერთი დიდი ბაზარი ხდება. ტიპიური უმსგავსოება.

* * *
კვდომაც თავგადასავალია...

* * *
იქ, სადაც სახელმწიფო აუცილებელ ბოროტებად მოიაზრება, საზოგადოება და ადამიანები არ არიან მომწიფებულნი სახარებისეული ჭეშმარიტების სინამდვილისათვის. სახელმწიფო ბოროტების აუცილებლობა ისეთი წყობისათვისაა დამახასიათებელი, რომელიც ღვთიური წესრიგისაგან არ მომდინარეობს.

* * *
ღირსსავსე ცხოვრება ფასზე მაღლა დგას.

* * *
პიროვნება ის პეპელაა, რომელიც ინდივიდის გარდაცვალებით იბადება.

* * *
სიმართლე, ადრე თუ გვიან, მუდამგზის იმარჯვებს. სიცრუე კი მხოლოდ დროებით ან ხანგრძლივ წარმატებას აღწევს, მაგრამ აროდეს-მარადიულს.

* * *
ქართველებსა და აფსუებს კვლავ მხოლოდ სიმართლე გაგვაერთიანებს. სიცრუე ჯერ-ჯერობით წარმატებულად გვაშორებს ერთმანეთს; სიცრუე, რომელიც არა ოდენ ქართველებსა და აფსუებს შორის მყოფობს, არამედ თავად ქართველ ერში პარპაშებს.

* * *
სიცოცხლე ბავშვია...

* * *
არცთუ იშვიათად, პოეზია ისაა, რაც არ გვაქვს.

* * *
ადამიანი თვალებთან იწყება და ბაგეებთან მთავრდება...

* * *
სიყვარულმა წყენა არ იცის.

* * *
სიყვარული ტკივილზე მაღლა დგას.

* * *
სიყვარულს ტკივილი სიყვარულითვე გადააქვს.

* * *
ნიცშე, რომელმაც სიკვდილის წინ საბოლოოდ აღიარა საკუთარი მარცხი ნაზარეველი ღმერთკაცის წინაშე, დასავლეთის რელიგიური თავგადასავლის უმწვერვალესი გამოვლინებაა.

* * *
დუმილი მუდამ ოქრო კი არა, შინაგანი სიყრუისა და უმწიფრობის ნიშანიც შეიძლება იყოს.

* * *
არცთუ იშვიათად როგორ უფრო მართებული იქნებოდა: www.literatura.ge, თუ www.kitsch.ge?

* * *
სადაც ორივე მხარე არ იმარჯვებს, იქ გამარჯვებაზე საუბარი ზედმეტია.

* * *
სიძულვილი და ინდიფერენტულობა ცარიელი სიტყვებით საუბრობენ. ეს სულიერი სიბერწისა და სიმუნჯის ენაა.

* * *
დიაბოლიკური განზომილების მახასიათებელი: კიჩი, ანუ არარსი. არარსი, ანუ კიჩი.

* * *
ცოდნა სიბრძნისაგან იმით განსხვავდება, რომ პირველი გარეგნულად შეძენილი ინფორმაციაა მაშინ, როცა მეორე შინაგანად დადუღებული და ნაცხოვრები რეალობა.

giovedì 6 agosto 2009

მარიამობისთვისა, 2009

* * *
ვინც ქალის ტუჩებიდან პოემას ვერ ამოიკითხავს, მას არაფერი ესმის ქალის.

* * *
შრომა კი არა, ღვაწლი აკეთილშობილებს ადამიანს.

* * *
ადამიანებს უვიცობისგან სწყინთ თავიანთი უვიცობა. ასე რომ არ ყოფილიყო, ეცოდინებოდათ, თუ როგორ გადაექციათ იგი ძვირფას სულიერ საგანძურად.

* * *
ყოფიერებისა და საკუთარი თავის გააზრება პოიეზისის, შემოქმედების პირველი საფეხურია.

* * *
ადამიანი ატომებს იქით იწყება და ატომებით გრძელდება.

* * *
უღმერთო ცოდნა მუდამ საზღვრულია და ამოწურვადი.

* * *
როდესაც წუთისოფლის ქალაქს ვშორდებით, ჩვენში არსებული ლაბირინთის გავლით უფლის ქალაქამდე გზის გაკვალვას ვცდილობთ.

* * *
ფილოსოფია რომ არა, კაცობრიობას კიდევ უფრო დაუგრძელდებოდა ჭეშმარიტებასა და ბედნიერებამდე მისასვლელი გზა.

* * *
კაცობა ჭეშმარიტებაა, კაცობრიობა კი-ამ სიმართლის ჯამი. და ეს მაშინ, როდესაც არაკაცების სიმრავლე თვითონ ხდება ერთი დიდი ტყუილი და მას სიცრუე მოსავს ტანს.

* * *
თვითშემეცნება მოყვასსა და ღმერთს გვაახლოებს.

* * *
სიყვარულის განხორციელება და ქმნა თვით სიყვარულადქცევის საწინდარია.

* * *
სიყვარული ისაა, როცა გიყვარს და სამაგიეროს არ ითხოვ. მეგობრობა კი ის დიდი საგანძური, რომელშიც ორი ასეთი სული ერთიანდება.

* * *
ზოგი მკვდარია და ჰყარს; ზოგს სძინავს; ზოგი იღვიძებს; ზოგიერთი კი მზის ბრყინვალებით ტკბება. ერწყმიან რა სიცოცხლის მზეს, მხოლოდ ერთეულები ხდებიან მზეები.

* * *
მოწოდებით, კაცობრიობა ერთი დიდი ოჯახია.

* * *
ერთია, სიკვდილთან ბრძოლაში საკუთარი თავიდან წვეთ-წვეთად გამოწურო მარადისობა და მეორე, თვითონ უკვდავების წყაროსთან შერთვით იქცე ამოუწურავ სიცოცხლედ.

* * *
ვინც ღირსეულად ცხოვრობს, არ კვდება, არამედ გარდაცვალების შემდეგაც აგრძელებს სიცოცხლეს.

* * *
თავისუფალი ადამიანი პიროვნებაა.

* * *
თევზები გემოვნებიანი ხალხია. კირჩხიბები კი მიესწრაფვიან გემოვნებას.

* * *
მოყვასისადმი უნდობლობა საკუთარი თავისადმი უნდობლობიდან გამომდინარეობს, რაც ისეთივე უკიდურესობაა, როგორც ყველასადმი ბრმა მინდობილობა.

* * *
ფილოსოფია ღრმადგააზრებული ცხოვრებისათვისაა საჭირო (რათა თავად იქცეს ასეთად) და არა იმისათვის, რომ ბერწვქმნათ ჩვენი აზროვნება და მოვკლათ იგი.

* * *
ქალთან ურთიერთობაში მამაკაცის უხეშობა კი არა, მისი უფრო მეტი სიმამაცე ჰხამს.

* * *
ხშირად ქრისტე-მაცხოვრის წუთისოფლისათვის უჩვეულო სიბრძნესა და ჩვენს შორის ჩვენივე ზარმაცი უვიცობა დგას.

* * *
სიცოცხლე, რომელიც ერთმანეთისაგან გვაშორებს, სიკვდილია: შესაბამისად ცხოვრება კი-კვდომა.

giovedì 2 luglio 2009

მკათათვისა. 2009

* * *
დამარცხება წარმატებას გულისხმობს, მაგრამ არ ნიშნავს გამარჯვებას. მარჯი მართებულობაა, რაც სხვა არაფერია, თუ არა განსხვავებულ აზრთა მორიგება და ორივე მხარის გამარჯვება.

* * *
ვისაც სძულს სიყვარულის შემდეგ, მას არც ჰყვარებია.

* * *
სილამაზე თვალს ახარებს, მშვენიერება-სულს.

* * *
მშვენიერება ულამაზესობაზე მეტია.

* * *
თუ მშვენიერი არ ხარ, ულამაზესობა არაა საკმარისი.

* * *
ბედნიერება მშვენიერებას მოაქვს თაურ და არა სილამაზეს.

* * *
ქართველებს ძალიან ბევრი რამ გვაქვს სასწავლი, უფრო მეტი-გასააზრებელი და გაცილებით კიდევ უფრო მეტი-საკეთებელი.

* * *
მანდილოსნები მეცოდებიან, თორემ პოეზიადაშრეტილი ფილოსოფია სწორედაც რომ ქალური საწყისითაა ხელახლა გასანოტივებელი. თუმცა, მამაკაცური საწყისის გარეშე იგი დაკარგავს თავის სიმტკიცეს.

* * *
ძალიან ბევრი რამის ცოდნაა საჭირო, რათა ბავშვურობაში გადავიზარდოთ.

* * *
სპონტანურობა-თავისთავადობასაც თავისი აღვირი სჭირდება.

* * *
ქრისტე მაცხოვარს სასწაულის მოხდენას ურწმუნო უვიცობითა და ამპარტავნებით სთხოვდნენ მაშინ, როცა ყველაზე დიდი სასწაული თვალწინ ედგათ.

* * *
ჩემი სასწაული ჩემი საყვარელი ხალხია; ყოველივე, რაც კი უფალს შეუქმნია.

* * *
სასწაული სასწავლია.

* * *
ადამიანებს შორის უმთავრესია ის, რაც უხილავი, გამჭვირვალე გვგონია და უფრო არსებითი, ვიდრე ბევრი ხილული და ხელშესახები რამ.

* * *
ადამიანი უფრო დიდი სამყარო შეიძლება იყოს, ვიდრე ყველა სახელმწიფო ერთადაღებული. ამად, დანაშაულია ამის არგათვალისწინება, როდესაც ადამიანის სიცოცხლეს არ აფასებენ.

* * *
ზოგჯერ, შიმშილი ცურვის სწავლას ჰგავს.

* * *
მეფური ბუნების ადამიანი სიყვარულში არ წვრილმანდება. მისი შინაგანი ბუნება სავსეა, მთელი, ერთიანი და მზიანი.

* * *
სიკეთეზე დამყარებული თავისთავადობა და ბუნებრიობა უდიდესი ადამიანობაა.

* * *
ვისაც ადამიანი უყვარს და სიყვარული არა, ან სიყვარული უყვარს და მოყვასი არა, სტყუის, რამეთუ ორივეს ერთიანობა სხვა არაფერია, თუ არა ღმერთში დაბრუნება.

* * *
ჰხამს, ადამიანი მარტომყოფიც კი იზრდებოდეს ზნეობრივად და ინაყოფიერებდეს საკუთარ ბედნიერებას.

* * *
სამყაროს ყოფიერებისა და საკუთარი თავის ფენომენოლოგიური შემეცნება არაა საკმარისი ბედნიერებისათვის, თუმცა, აუცილებელია კი.

* * *
სანამ გონებით განჭვრეტილი სიკეთე გულში არ განხორციელდება, ვერ იქცევა ადამიანის საუკეთესო შინაგან მდგომარეობად.

* * *
კაცი უნდა იყო, კაცს კაცობა რომ გაუგო და კიდევ უკეთესი-კაცურად იცხოვრო.

* * *
უზნეობა სირცხვილის შეგრძნების დაკარგვას იწვევს-უსირცხვილო ადამიანი კი ცხოველის საფეხურამდე დადის.

* * *
უსიყვარულოდ დემონებს ვემსგავსებით.

* * *
სიყვარული ჭეშმარიტებაა, უსიყვარულობა კი-ცრუ ყოფიერება.

* * *
განათლება სიკეთის განხორციელების პირდაპირპროპორციულია და არა პატივის მოხვეჭის.

* * *
არსობრივად მართვა მსახურების ყველაზე კეთილშობილური ფორმაა. ყველაფერი, რაც წინათქმას არ შეესაბამება, დესპოტიზმია, რომელსაც ეგოიზმი და ძალადობა ბადებენ. ეს კი, ადამიანში, თუ ადამიანთა ჯგუფში გაბატონებული სიცრუისა და სიკეთე-ბოროტების ცნებათა აღრევის შედეგია.

* * *
ბედნიერების მპოვნელი ღმერთს პოულობს.
სიყვარულის მპოვნელი ღმერთს პოულობს.
მშვენიერების მპოვნელი ღმერთს პოულობს.
ჭეშმარიტების მპოვნელი ღმერთს პოულობს.
უკვდავების მპოვნელი ღმერთს პოულობს.
სიცოცხლის მპოვნელი ღმერთს პოულობს.
მოყვასის მპოვნელი ღმერთს პოულობს.
სრულყოფილების მპოვნელი ღმერთს პოულობს.

* * *
ზოგიერთის ცხოვრება კითხვაა და კითხვათა სიმრავლე, ზოგიერთისა-მტკიცებულება, მოწამეობა; უმრავლესობისა კი-არც ერთი და არც მეორე.

* * *
უზენაესი ხელოვნება ჩვენში ხელოვნებისვე გაცოცხლებაა. ეს კი თავად ცხოვრებას გარდაქმნის უზენაეს ხელოვნებად.

* * *
ადამიანები, ჩვენ თვითონ ვართ ლაბირინთული ციხე-სიმაგრეები, რომელთა შუაგულამდე მიღწევა გვამზიურებს.

* * *
რაც უფრო ვუახლოვდებით წმინდა სამებას, მით უფრო ვთავისუფლდებით, რადგან ღმერთი თვითონაა უზენაესი თავის-უფლება.

* * *
იყო პიროვნება, ეს მთელი ცხოვრებაა.

* * *
ადამიანთა უმრავლესობის აზროვნება გახვრეტილ შაურად არ ღირს; უფრო ნაკლებისა-ათასებად ფასდება, ერთეულებისა კი-ფასდაუდებელია.

* * *
პიროვნულად სუსტია ის, ვინც სხვას ტკივილს აყენებს; ხოლო შინაგანად ძლიერი და გაცილებით სრულყოფილი ის, ვინც სხვათ აბედნიერებს.

* * *
ვინც თავის საქმეს კარგად და ზნეობრივი მართებულობით აღასრულებს, კარგი პოლიტიკოსია.

* * *
პომადა-კოცნით ნაამბორები ტუჩის ფერადი რიდე.

* * *
ადამიანთა უმრავლესობას იმაზე მეტი არ ესმის, რამდენსაც ამბობს. რჩეულები კი მუდამ იმაზე გაცილებით ნაკლებს ამბობენ, ვიდრე ესმით.

* * *
ზოგჯერ დუმილში: სიმართლეს გეტყვი-არ მოგეწონება, ტყუილს გეტყვი-არ მომეწონება.

* * *
მტერს ეშინია პატიოსანი და მშვიდი კაცის.

* * *
ხარისხი მუდამ სჯობს რაოდენობას, ხარისხის რაოდენობა კი საუკეთესო ზომა და ოქროს შუალედია.

lunedì 1 giugno 2009

თიბათვისა, 2009

* * *
მორიდება და გამბედაობა, შეგნება და სიმამაცე ერთმანეთს თუ არ ავსებენ, ცალ-ცალკე უმსგავსოებაში გადადიან.

* * *
გეორგიანულობა-წუთისოფელში უკვდავების ოაზისობა

* * *
ცოდნა ისაა, რომელიც ტვინის ჭყლეტით კი არ იბადება, არამედ თავისთავად მოედინება ანკარა წყაროსავით.

* * *
ადამიანთა უდიდესი უმრავლესობა ეპოქათა ნაწილია. მხოლოდ ერთეულები წარმოადგენენ მთლიან ეპოქას.

* * *
ღიმილი ადამიანის მზეობის პირველი საფეხურია.

* * *
მეგობრობა წარმოუდგენელზე მაღლაც დგაც.

* * *
ზნეობა საუკეთესო პოლიტიკაა, ხოლო საუკეთესო პოლიტიკოსი იგია, ვისაც გააჩნია საკუთარი პიროვნებისა და გარესამყაროს გაუმჯობესება-სრულყოფის ნიჭი, ნება, შემძლეობა, სიბრძნე და სიყვარული.

* * *
ხშირად, ქალს, რომელიც ხმამაღლა ითხოვს სიყვარულს, არ უყვარს და არც თვითონ უყვართ.

* * *
დროს თუ გინდა გაუსწრო, კვალში კი არ უნდა ჩაუდგე მის რიტმს, არამედ საკუთარი უნდა იპოვო.

* * *
ერთადერთი ღირებული სიახლე ამ ცისქვეშეთში თითოეული ჩვენთაგანია.

* * *
სადაც პოეზიაა, იქ ფილოსოფიაცაა და ცოდნაც. ამ ტრიადის სათავე კი ღვთაებრივი მზიურობაა. ფუტურიზმი-ფსევდოპოეტური მიმდინარეობაა.

* * *
ავტორიტეტი წლებს კი არ მოაქვს, არამედ შინაგან სიმწიფეს. ხოლო თუკი ყოველივე ამას ასაკი და სისხლისმიერი ნათესაობა ერთვის თან, მით უკეთესი.

* * *
გული დუმილით მეტყველებს-ყველა ყური ვერ გაუგებს მის სიტყვებს.

* * *
განათლება მეტ პასუხისმგებლობას ნიშნავს.

* * *
სიყვარულის ხარისხი სრულყოფილების ოდენობის პირდაპირპროპორციულია.

* * *
მომავალს წარსულისა და აწმყოს ქორწინება შობს.

* * *
სიყვარული რწმენის ზებუნებრივი სხეულია.

* * *
ყველაზე უფრო დიდი და საინტერესო თავგადასავალი თვითონ ადამიანია, რომელიც კიდევ უფრო ღირებული მაშინაა, ოდეს ყოფიერების ლაბირინთში ეს მგზავრობა-მგზავრი მზისკენ იკვალავს გზას.

* * *
მარადქალური ქალის მოყვარული კაცი უფრო დიდი მეომარია, ვიდრე იარაღის დემონსტრაციულად მოჟღარუნე.

* * *
კაცი ხასიათი უნდა იყო და არა-ქვევრი.

* * *
საკუთარ თავზე გამარჯვებაა თავის-უფლება.

* * *
ყველაზე დიდი მეომარი მშვიდობის ხელმწიფეა.

* * *
პოეზია ფილოსოფიას ერთი ნაბიჯით უსწრებს წინ.

* * *
პოეზია ღვთისმეტყველებაა და ღვთისმეტყველება პოეზიაა.

martedì 5 maggio 2009

ვარდობისთვე, 2009

* * *
უზენაესი ფილოსოფია პოიეზისია. ეს უკანასკნელი სიბრძნის სიყვარულის საუკეთესო ჭურჭელია.

* * *
ანტიკური მემკვიდრეობის გათავისებით შუა საუკუნეებში ქრისტიანობამ შეამზადა ნიადაგი, რათა ღმერთი, ღვთიური წესრიგი და ღმერთკაცობა ყოველდღიური საზოგადოებრივი და სამოქალქო ნორმა გამხდარიყო.

* * *
ადამიანის სიდიადე თავმოყვარე თავმდაბლობაზე გადის.

* * *
სიმართლე სამამაცოა.

* * *
შეიძლება უყურებდე ადამიანს და ვერ დაინახო იგი. შეიძლება არ უყურებდე და არ გედგეს თვალწინ, მაგრამ ხედავდე მას ათასი კილომეტრის იქითაც კი.

* * *
ტანი სულის ყურია.

* * *
მთელი სამყარო რომ გაჩახჩახდეს, ჯერ ჩვენ უნდა ავინთოთ მზეებად.

* * *
პოეზია ოდენ ისაა, რომელსაც სულის რუკებზე ერთი მტკაველით მაინც შეუძლია მთების გადადგმა.

* * *
სიცოცხლე თვითონაა მოძრაობა და ირგვლივაც მოძრაობაში მოჰყავს ყოველივ-შეიძლება ერთი ადგილიდან არ იძვროდე და მაინც მთელი სამყარო შემოიარო.

* * *
ყველაზე დიდი პოეტები ისინი არიან, ვინც ადამიანის გულისა და სულის ფურცლებზე წერენ და არა ქაღალდზე.

* * *
პოეტი ისაა, ვინც ადამიანთა ბედნიერების საფუარია.

* * *
პოეზია სულის ისეთი წვრთნა და განმტკიცებაცაა, რომელიც ბანალურობით სნეულ ყოფიერების ზღვაში ერთი თავით უფრო მაღლა გაყენებს.

* * *
სრულყოფილება მიტომაა სრულყოფილება, რომ საზღვარი არ გააჩნიაა-რაც უფრო მეტს დაიტევ, მით უკეთესი.

* * *
ადამიანები მზეები ვართ. უბრალოდ, კიდევ უფრო მეტი მზიანობა არსებობს-რაც მეტს მოიპოვებ და დაიტევ, მით უკეთესი.

* * *
ადამიანში გაუხმაურებლად არსებული სიბრძნე ძალუმი მაშინაა, როცა დუმილით კიდევ უფრო უღრმავდებიან და მოქმედებაში მოჰყავთ იგი. ერთი შეხედვით, ასეთი საუნჯის მქონე პიროვნების დანახვა არაა ადვილი-გულისხედვა უნდა გქონდეს მახვილი, რომ შეამჩნიო.

* * *
მდუმარედ საქმიანი სიბრძნე უფრო ღრმა და მეტია.

* * *
სიბრძნე მოსასმენადაც თაფლია. მაგრამ განხორციელებული სახით-უფრო ძლიერი.

* * *
რა იქნებოდა სრულყოფილება, ამოწურვადი და საზღვრული რომ ყოფილიყო? არც რა.

* * *
როცა ადამიანი თავისი პიროვნების საზღვრებს აცნობიერებს, უფრო უბრალოა და ნათელი. ხოლო სანამ თავისი სიდიადე უსაზღვრო ჰგონია, მუდამ ილუზიებით დამძიმებული ივლის და ვერ ეღირსება მშვიდობიან და მზიან დღეებს.

* * *
ყველაზე ტკბილი პიროვნების ხასიათის შინაგანი სიმრგვლეა.

* * *
რა იშვიათი ბედნიერებაა ფასდაუდებელი სულის მქონე ადამიანის შეხვედრა.

* * *
თუ ვერ შეიყვარე ადამიანი ისეთი, როგორიცაა, სხვანაირად მას ვერ შეიყვარებ.

* * *
ჩვენი ბავშვობა ზეციური ბავშვობის წინასახეა.

* * *
როდესაც პოლიტიკა კეთილსინდისიერი და ღირსეული ადამიანების ხელში არ იმყოფება, იგი უცილოდ ანტი-პოლიტიკად გადაიქცევა.

* * *
სევდა სიცარიელისკენ გადადგმული ერთი ნაბიჯია.

* * *
სოკრატე-ფილოსოფიური აიკიდოს დიდოსტატი...

* * *
ვინც არ ცხოვრობს, ბურიდანის ვირია...

martedì 14 aprile 2009

აპნისი, 2009

* * *
ნეტარ იმას, ვისთვისაც სიცოცხლეც და გარდაცვალებაც ღირსების განმამტკიცებელია.

* * *
განათლებული და ნაკითხი ერთმანეთისაგან იმითაც განსხვავდება, რომ ეს უკანასკნელი კარიკატურული ცოდნის მფლობელია მაშინ, როცა პირველი ცხოვრობს და ახორციელებს ცოდნას.

ნაკითხი ადამიანი ცხოვრების ჩუქურთმაა ოდენ, განათლებული კი თვითონაა არსებობის შინაარსის გამამზიანებელი.

* * *
ზოგიერთი ცხოვრების წყლებში უმისამართოდ ტივტივებს. ზოგი ცურვის დასაწყებად არც დაძრულა ადგილიდან. ზოგმა კი საკუთარი თავი მეორე ნაპირზე გადასვლამდე კარგად გაწვრთნა, მიზანიც კარგად განჭვრიტა და მისი ცურვა თვითონ გადაიქცა მზიანი ნების ძალუმობად. პოიეზისი სიცოცხლის საუკეთესო სახეა.

* * *
ბუნებით ზეციური მიწათმოქმედი უნდა იყო, რომ უბრალო მოვლენისა და საგნისაგაც კი უკვდავება მიიღო ნაყოფად.

* * *
სწავლა რისთვის? იმისათვის, რომ სნეულ ცნობიერებაზე დამყარებული სისტემის ნაწილი გახდე, თუ იმისათვის, რომ განათლდე და ბედნიერებას ეწიო, ხოლო შენი ბედნიერებით სხვასაც არგო?

* * *
ქრისტე ყველა დროის უდიდესი მინდია და ალქიმიკოსი-ღმერთია: მან თავისი ცხოვრებით, ჯვარცმითა და აღდგომით სიკვდილიც კი სიცოცხლედ აქცია.

* * *
ვინც ოდენ ლამაზია, წლებთან ერთად ყვავილივით დაჭკნება. მხოლოდ და მხოლოდ მშვენიერი ლამაზდება კიდევ უფრო სიბერეში.

* * *
სრულყოფილება იმ მთასა ჰგავს, რომელსაც მწვერვალი არ გააჩნია.

* * *
კაცი უპირველესად მუხა უნდა იყო და არა ბამბა.

* * *
სულიერად კეთილშობილი ადამიანის დუმილიც კი პოეზიაა.

* * *
თავაზიანობა ბოდიშს იხდის, კეთილშობილება კი-მადლობას.

* * *
შენზე მაღალი ღირსების ადამიანის დუმილს რომ გაუგო, შესაბამისად უნდა გაიზარდო ჯერ.

* * *
ჩვენი სულის სიღრმეში არსებული მუსიკა ყველაზე დიდი მუსიკაა და მას დუმილით თუ ჩასწვდები-შესწვდები.

* * *
ერთია დაკვირვება, გათავისება-მეორე.

* * *
სიცრუე არღვევს სამყაროულ წესრიგს და ძალადობას განაპირობებს.

* * *
გულისხმიერი ადამიანისათვის ქალის ბუნება მამაკაცური რაობის ისეთივე მზრდელია, როგორიც ეს უკანასკნელია იგივე შინაარსის მატარებელი ქალურობისათვის.

* * *
კაცობრიობა სამოთხეში ჯოჯოხეთის გავლით ბრუნდება.

* * *
დუმილის ჭურჭელი ივსება სიმშვიდით.

* * *
კაცობრიობის ანტიკური ხანის ცნობიერება-ანტიკური ალქიმია.

* * *
უკვდავი ნაწარმოები იმითაც ჰგავს მარადისობას, რომ ერთჯერ მაინც მოჰყავს მოძრაობაში ნებისმიერი ადამიანის გული.

* * *
პოიეზისის სიდიდე მოქმედებაში მოყვანილი და განხორციელებადი ფილოსოფიის სიდიდის პირდაპირპროპორციულია.

* * *
კაცობრიობა ჯერ-ჯერობით არ დგას სულიერი განვითარების იმ ხარისხზე, რომ პოეზიის სინამდვილე ირჩიოს და ამჯობინოს ჩვენში და ჩვენს ირგვლივ არსებულ კვდომით სნეულ არსებობას.

* * *
ყველა ადამიანი გენიოსია. უბრალოდ, ყველას არ ჰყოფნის გენიალობა საკუთარი გენიალობის აღმოსაჩენად.

* * *
უბრალოდ ოდენ ისინი საუბრობენ, ვინც ღრმად ჩასწვდა საგანს.

* * *
ნაკითხი იყურება, განათლებული-ხედავს. მზე-რა განათლებული ადამიანის ხედვაა.

* * *
თავის-უფალი სხვაზე არ ბატონობს.

* * *
ვიღაც "სნობი-ერებას" ირჩევს, ვიღაც კი-ბედნიერებას.

* * *
მით უფრო დიდია შემოქმედება, რაც უფრო ღრმაა თვითშემეცნება.

* * *
სი-კეთ-ე უსამართლობითა და ძალადობით სნეული წუთისოფლის დინების საწინააღმდეგოდ ცურვაა. ნეტარია ამ ცურვაში გამობრძმედილი სულის სხეული.

* * *
სიყვარულს არ სძულს. ის, რაც სიძულვილს იწვევს, სიყვარული არ არის, ხოლო ის, რაც სიყვარული არაა, არანაირი ღირებულება არ გააჩნია.

* * *
განათლებული ღვთის მიერ გახსნილ კარში შედის, გაუნათლებელი კი-ჩიხში.

პ.ს. ბევრის კითხვა განათლებას არ ნიშნავს.

* * *
პავლე მოციქულის ხმალი მშვიდობის, სიმამაცის, სიბრძნის, სამართლიანობისა და სიკეთის სიწმინდეა.

* * *
ინდოევროპელების მოსვლა დასავლეთში იგივე შედეგების მომტანი იყო, როგორიც ბარბაროსებისა რომის იმპერიაში, სადაც ამ უკანასკნელის ნანგრევებზე ქმნიდნენ თავიანთ სამეფოებს.

mercoledì 11 marzo 2009

მირკანი, 2009

* * *
ადამიანმა მხოლოდ იმაზე რომ წეროს, რაც იცის, შორს ვერ წავა.

* * *
ჩიტები ჭიკჭიკით გვეუბნებიან იმას, რასაც მცენარენი დუმილით გვამცნობენ.

* * *
მეფურობა-კეთილშობილება სისადავესა და უბრალოებაშია; არა ამაოების ზიზილ-პიპილოებსა და წარმავლობაში.

* * *
ბრძენი მუდამჟამს ეძიებს იმ ერთადერთ კარს, რომელსაც განგება მისთვის აღებს.

* * *
"მოდი ჩემთან"-ს გულის სიღრმიდან მხოლოდ სიყვარული იძახის: მისი საფუძველი ადამიანში არსებული ღვთიური და მშობლიური გრძნობაა.

* * *
გულით და არა ფულით სიმდიდრე.

* * *
სიყვარულია უზენაესი ღირსება.

* * *
იშვიათი საბედნიერო გამონაკლისები კეთილშობილ სულთა თვისებაა.

* * *
სიყვარულის ფესვი და სიმტკიცე მეგობრობაა.

* * *
ძალა სიცოცხლითსავსე სიტყვას გააჩნია.

* * *
ლოცვის შინა-არსი პოეზიაა. ეს უკანასკნელია ღმერთთან საუბრის უზენაესი პირველსახე.

* * *
ძალუმი სიყვარული და სიკეთეა ვაჟკაცობის უპირველესი სათავე.

* * *
სიბრძნე არა ოდენ სიკეთისა და ბოროტების გაცნობიერებაა, არამედ უკვდავების უსაზღვრობისა და მოკვდავობის საზღვრულობისაც.

* * *
სიკეთე ისეთი რამეა, რომ მის წინააღმდეგ მოქმედს მარადისობის წინაშე საკუთარი თავისთვის გამოაქვს განაჩენი.

* * *
დემონი ჩემი სისუსტის კატალიზატორია და არა ჩემი სიძლიერისა და სიმტკიცის.

* * *
გენიოსის შეცნობასაც თავისი წილი გენიალობა სჭირდება.

* * *
თუ გინდა შინაგანი და სამყაროული არსებობის გაუმჯობესება, კიდევ უფრო გაიკეთილშობილე საკუთარი თავი და მოეფერე, მოესიყვარულე სხვებს.

* * *
გულსავსე ადამიანების საუბარიც საქმეა.

* * *
ცოდვათა ჩადენის შემთხვევაში ვხვდებით უღირსები, თორემ ღმერთმა ყველანი კარგი გაგვაჩინა.

* * *
ზოგი რამის თქმაც კი არ ღირს,
ზოგს დუმილი დამშვენდება.

* * *
გულია არსებობის წრის ცენტრალური წერტილი.

* * *
ხშირად ლამაზი დუმილი მწარე სიმართლეზე მეტია.

* * *
ღირსების ხარისხი საქმიანი დუმილის პირდაპირპროპორციულია. წუთისოფლის ტრაგიკულობა კი ისაა, რომ ცოტაოდენს თუ ესმის და ცნობს ერთსაც და მეორესაც.

* * *
ბედნიერება მუდამ ღმერთივით ახლოსაა. ოღონდაც ეგაა, რომ ჩვენი შინაგანი სიბრმავისა და მოუმწიფებლობის გამო ხშირად თვითონვე ვიშორებთ თავს მისგან.

* * *
სიყვარული კეთილშობილი სულის ვაჟკაცობა და სიბრძნეა. ვისაც უყვარს, არ წუწუნებს და ოდენ მოცალე შინაგანი ბუნების მქონეთ თუ ესმით ასეთი ადამიანის დუმილით თქმულის.

lunedì 2 febbraio 2009

სარწყუნისი, 2009

* * *
ჯანსაღი დამოკიდებულება საკუთარი თავისადმი გამართული თავმოყვარეობის საწინდარია.

* * *
თავმოყვარეობა ზრდილობის ბიძაშვილია.

* * *
ჭირსა თუ ლხინში ფილოსოფოსის შინაგანი სამყარო მშვიდია, პოეტისა კი ორივე შემთხვევაში მღერის, შემოქმედებს. კურთხეულია პოეტური სიბრძნე.

* * *
სულიერი სიმშვიდე და ჰარმონია კოსმიური მუსიკის ყურია.

* * *
გონება კითხვაა, რწმენა-პასუხი.

* * *
ქალები-თბილი მთვარეები.

* * *
პოეზია ბედნიერებაა.

* * *
უვიცობა ღირსებისა და საკუთარი თავის მტრობაა.

* * *
უვიცობა სუსტი თავმოყვარეობის წყაროა.

* * *
ქართული ლხინი უძველესი წარსულის მქონე კოსმიური ჰარმონიაა.

* * *
რჩეულთა ლხინი სულის გამაკეთილშობილებელი აკადემიაა.

* * *
განათლების სიყვარული სიბრძნეა: პირველი კი, ცოდნისაგან იმით განსხვავდება, რომ ამ უკანასკნელის სრულყოფილ, უზენაეს გამოვლინებას წარმოადგენს.

* * *
როკვა ეროსის გამოვლინების უდახვეწილესი სახეთაგანია.

* * *
ზოგიერთისათვის საყვარელი ადამიანი კეთილშობილების საფუარია, ზოგიერთისათვის-სიმტკიცე, ზოგისთვის კი-მისი გვირგვინი.

* * *
სრულყოფილება დუმილით მოქმედებს და ძალუმობს.

* * *
ფილოსოფია სიკვდილის სიბრძნის მატარებელია, პოეზია-სიცოცხლის. ორივეს შინაარსი ყოფიერების შემავსებელია.

* * *
უმრავლესობას ისტორიის წაკითხვა შეუძლია, ნაკლებს-მისი შექმნა; ერთეულებს-ერთიც და მეორეც.

* * *
პოლიტიკა ადამიანის, ოჯახის, ერის, კაცობრიობის ჯანსაღი ცხოვრების წესია. ყოველივე ის, რაც ამ წესს ეწინააღმდეგება, ან მისგან განსხვავდება, უმეცრებისა და შეცდომის ნაყოფია.

* * *
პოეზია სიცოცხლეა და არა პროფესია.

* * *
ადამიანი ის პრინციპებია, რომელთაც და როგორადაც აღიქვამს საკუთარ თავსა და გარესამყაროს.

* * *
გულის თვალით ვეხებით ჭეშმარიტებას, გონების თვალით კი ოდენ ვჭვრეტთ მას. სიყვარული გულის ხედვაა.

* * *
მოუზომავი ვნებები გრძნობების გაბლაგვებას იწვევენ.

* * *
სატრფო ის წიგნია, რომელშიც ღმერთი იკითხება, მიჯნურის თვალები და სული კი მისი სათაურია.

* * *
გონება გრძნობების მტკიცია.

* * *
სწავლა სულიერი კეთილშობილების გაღვიძებაა, მისი წვრთნა და განმტკიცება.

* * *
ღმერთი სიყვარულით იგრძნობა.

* * *
ვინც ღმერთს გულით ეძიებს, ბევრისთვის წარმოუდგენელ და მოულოდნელ ადგილასაც იპოვის მას.

* * *
ჯანსაღი გრძნობა და კეთილგონიერება ჯანსაღი რწმენის უმტკიცეს საფუძვლებს ქმნიან.

domenica 25 gennaio 2009

სარწყუნისი, 2005

* * *
სამშობლოსადმი სამსახურმა ადამიანობა არ უნდა დაგაკარგვინოს, რადგან აქ გადის სამართლიანობისა და უსამართლობის ზღვარი.

ღვინობისთვე, 2004

* * *
მართებულია, როცა ადამიანი ამბობს იმას, რასაც ფიქრობს. მეგობრობაში ასე ხდება.

lunedì 12 gennaio 2009

იგრიკა, 2009

* * *
პოეტები იმად კი არ ვართ, რომ ლექსებს ვწერთ, არამედ იმად, რომ გვიყვარს.

* * *
ცარიელი გულისთვის სიყვარულიც ამაოებაა მაშინ, როცა გულმზიანი ადამიანი ამაოებასაც კი ამარადისებს.

* * *
სიყვარულის გულის ჭურჭელში დატევას თავსი ვაჟკაცობა და სიბრძნე სჭირდება.

* * *
სიყვარული ისიცაა, როდესაც უსიამოვნებაც კი ერთით მეტი მიზეზია სიყვარულის ზრდის

* * *
პატარაა იმ ადამიანის სიყვარულის ჭურჭელი, ვისაც არ ესმის მდუმარედ მეტყველი ტრფობის.

* * *
ზოგიერთი ფსიქოლოგიას წიგნებიდან ეცნობა, ზოგი კი გულისხმიერი იბადება.

* * *
ის ადამიანი ფლობს კარგად ენას, ვინც სიყვარულს მეტყველებს.

* * *
სიყვარულში წარსული, აწმყო და მერმისი ერთი მთლიანობაა.

* * *
პოეზია ისტორიის შემოქმედებაა. ეს უკანასკნელი კი-უფრო შექმნილის გააზრება და მოწესრიგებული აღწერა.

* * *
ის უფრო ახლოსაა უფალთან, ვინც აცნობიერებს, რომ გულითაც და გონებითაც შორსაა მისგან, ვიდრე ის, ვინც კიდევ უფრო დაშორებულია ღმერთს, მაგრამ თავი ღვთისგან განათლებულად მოაქვს.

* * *
სიყვარული სიკვდილ-სიცოცხლის ზღვარზე გადის და ორივეზე მაღლდება.

* * *
სიყვარული ერთიანობის სისავსეა.

* * *
სულიერი კეთილშობილებაა ვაჟკაცობა.

* * *
საინტერესო ადამიანის გვერდით ცხოვრება ბედნიერებას არ ნიშნავს-ეს ოდენ ამისკენ გადადგმული პირველი ნაბიჯია.

* * *
დედოფალს მეფის და მეფისადმი სიყვარული ქმნის დედოფლად; მონებს ავხორცები ელტვიან.

* * *
ადამიანი საკუთარი ჩანაფიქრებისა და მათი განხორციელების ხარისხით ადამიანობს.